.jpeg)
ધર્મિષ્ઠાબેન ગજ્જર (ગુજરાત રાજ્ય બાળ અધિકાર સંરક્ષણ કમિશનના અધ્યક્ષ)એ જામખંભાળિયા પ્રવાસ દરમિયાન ‘ચિલ્ડ્રન હોમ ફોર બોયઝ’ની મુલાકાત લઈને બાળકોના સર્વાંગી વિકાસ અંગે માર્ગદર્શન આપ્યું હતું. મુલાકાત દરમિયાન તેમણે બાળકોમાં વાંચનની સંસ્કૃતિ વિકસે અને તેમના જ્ઞાનમાં વધારો થાય તે હેતુથી ‘બાલ ભારતી’ પુસ્તકો ભેટ આપવાની ભાવના વ્યક્ત કરી હતી.
ધર્મિષ્ઠાબેન ગજ્જરે જણાવ્યું હતું કે સંસ્થામાં રહેલા બાળકોને શિક્ષણ સાથે સંસ્કાર અને પ્રેરણાત્મક વાંચનનું ભાથું મળે તો તેઓ જીવનમાં આગળ વધી શકે છે. વાંચન બાળકના વ્યક્તિત્વ નિર્માણમાં અગત્યની ભૂમિકા ભજવે છે, અને યોગ્ય માર્ગદર્શન સાથે તે તેમના ઉજ્જવળ ભવિષ્ય માટે મજબૂત પાયો પુરવાર થાય છે.
આ સૂચનને સાર્થક કરતાં બાળ કલ્યાણ સમિતિના સભ્ય શ્રીમતી કિર્તીદાબેન ઉપાધ્યાય એ પોતાના સ્વખર્ચે ‘બાલ ભારતી’ પુસ્તકો ખરીદી સંસ્થાને અર્પણ કર્યા છે. તેમની આ સેવાભાવી પહેલથી સંસ્થાના બાળકોમાં આનંદની લાગણી પ્રસરી ગઈ છે અને તેઓ હવે વધુ ઉત્સાહ સાથે વાંચન પ્રવૃત્તિમાં જોડાઈ શકશે.
ધર્મિષ્ઠાબેન ગજ્જરે કિર્તીદાબેન ઉપાધ્યાયના આ પ્રયાસને બિરદાવતાં જણાવ્યું કે સમાજમાં આવા સંવેદનશીલ અને જવાબદાર નાગરિકો હોવા એ ગૌરવની વાત છે. બાળકોના જ્ઞાનવર્ધન અને સર્વાંગી વિકાસ માટે આ પ્રકારની સહાય અત્યંત મહત્વપૂર્ણ છે.
આ સમગ્ર પ્રસંગે સંસ્થાના સંચાલકો અને બાળકોમાં નવી પ્રેરણા જગાવી છે. ‘બાલ ભારતી’ પુસ્તકોની ભેટ માત્ર પુસ્તકોનું દાન નહીં પરંતુ બાળકોના સપનાઓને પાંખ આપવાનો પ્રયત્ન છે. સમાજના અન્ય દાતાઓ પણ આવા પ્રયત્નોથી પ્રેરાઈ બાળકોના કલ્યાણ માટે આગળ આવે તેવી અપેક્ષા વ્યક્ત કરવામાં આવી છે.