લેફ્ટનન્ટ જનરલ અસિત મિસ્ત્રીને રાષ્ટ્રપતિ દ્વારા "પરમ વિશિષ્ટ સેવા મેડલ" થી સન્માનિત કરવામાં આવ્યા
દિલ્હી : લેફ્ટનન્ટ જનરલ (નિવૃત્ત) અસિત મિસ્ત્રીને પરમ વિશિષ્ટ સેવા મેડલ (PVSM) એનાયત કરવામાં આવ્યું હતું. નવી દિલ્હીમાં રાષ્ટ્રપતિ ભવનમાં આયોજિત એક કાર્યક્રમમાં રાષ્ટ્રપતિ રામનાથ કોવિંદે તેમને આ મેડલથી સન્માનિત કર્યા હતા.. 72માં પ્રજાસત્તાક દિવસના અવસર પર તેની જાહેરાત કરવામાં આવી હતી. ભારતીય સેનામાં આટલા ઉચ્ચ હોદ્દા પર પહોંચેલા તેઓ માત્ર ત્રીજા ગુજરાતી છે. અગાઉ ભારતીય સેનામાં કમાન્ડર-ઈન-ચીફ રહી ચૂકેલા જનરલ રાજેન્દ્રસિંહ જાડેજા અને લેફ્ટનન્ટ જનરલ મહિપતસિંહ જ આટલા ઉચ્ચ પદ સુધી પહોંચ્યા છે.
મૂળ વડોદરાના લેફ્ટનન્ટ જનરલ મિસ્ત્રી ગયા મહિને NDAના કમાન્ડન્ટ તરીકે નિવૃત્ત થયા હતા. તેઓ મરાઠા લાઇટ ઇન્ફન્ટ્રીના કર્નલ હતા. ચાર દાયકાની તેમની લશ્કરી કારકિર્દીમાં, તેમને અતિ વિશિષ્ટ સેવા મેડલ (AVSM), સેના મેડલ (SM), વિશિષ્ઠ સેવા મેડલ (VSM) એનાયત કરવામાં આવ્યા છે. નિવૃત્તિ પછી, તેઓ હવે રક્ષા શક્તિ યુનિવર્સિટી, આંતરિક સુરક્ષા, સંરક્ષણ અને વ્યૂહાત્મક અધ્યયનની શાળાના નિયામક તરીકે કાર્યરત છે.
25 ઓક્ટોબર 1961ના રોજ વડોદરામાં જન્મેલા લેફ્ટનન્ટ જનરલ મિસ્ત્રીએ સૈનિક સ્કૂલ બાલાચડીમાં અભ્યાસ કર્યો હતો અને 1978માં NDA માટે પસંદગી પામ્યા હતા. પરમ વિશિષ્ટ સેવા મેડલ એ ભારતનું લશ્કરી સન્માન છે જે શાંતિકાળમાં સૌથી અસાધારણ કાર્ય માટે આપવામાં આવે છે.
